Alfonso Sánchez Portela (Madril, Espainia, 1902ko azaroaren 16a - 1990eko martxoaren 11a) argazkilaria izan zen. Madrilen ikasi zuen Argazkilaritza, aitaren argazki-estudioan; han ikasi zituen lanbide horren teknikak. Hamalau urte zituenerako El Heraldo aldizkariko lankide zen, eta ondoren, El Sol, El Imparcial eta La Voz aldizkarietan lan egin zuen. Berriemaile gisa 1922an iritsi zitzaion ospea, Marokoko gerraren garaian, batez ere Abd el-Krim Rifko buruzagiaren erretratuari esker. Espainiako Gerra Zibilaren ondoren, debekatu egin zioten aldizkarietan lanean jarraitzea, baina erretratuak egiten jarraitu zuen. Ospetsuak izan ziren Caricaturas fotográficas (1949, Argazki-karikaturak) eta El Madrid nocturno (1951, Gaueko Madril) erakusketak. 1989an Espainiako Arte Ederretako Akademiako kide hautatu zuten.
Erreferentziak
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.
Irudi gehiago
Espainia
Datuak: Q8195195
Multimedia: Alfonso Sánchez Portela / Q8195195
